Hirvonen vann Monte Carlo rallið

Betra seint en aldrei.

Það var Mikko Hirvonen (Ford Fiesta S2000) sem stóð uppi sem öruggur sigurvegari í þessari erfiðu rallkeppni sem lauk á laugardaginn, en það var ekki fyrr en á næst síðustu leið sem hann gat farið að slaka á því fram að því sótti Sebastien Ogier (Peugeot 207 S2000) hart að honum en rétt í lokin féll Ogier úr leik eftir útaf akstur og svo bilaðan rafal í framhaldinu. Öruggur í öðru sæti var þá Juho Hänninen (Skoda Fabia S2000) en næstur á eftir honum var liðsfélagi hans hjá Skoda liðinu, Nicolas Vouilloz. Stephane Sarrazin (Peugeot 207 S2000) tók fjórða sætið en þrátt fyrir að hafa verið mjög fljótur þá töfðu endalaus dekkjavandræði fyrir honum og endaði hann þetta rall um fjórum mínutum á eftir landa sínum Vouilloz. Fimmti varð Jan Kopecky (skoda Fabia S2000) og var hann á undan Guy Wilks (Skoda Fabia S2000) sem virtist aldrei vera full sáttur við uppsetninguna á bílnum.

Um helgina lauk einnig Quatar rallinu en þá keppni vann Nasser Al-Attiyah og unni því Ford Fiesta bílar sínar fyrstu keppnir bæði á malbiki og möl. Ég las reyndar að M-sport, sem smíðar þessa Ford Fiesta bíla, er einungis að afhenda 22 svona bíla næstu vikurnar. Rétt er að hafa í huga að svona bíll kostar varla undir 300.000 evrum þannig að það er nú ágætur bissnes í þessu....

Nasser Al-Attiyah á fullri ferð í Quatar rallinu.