Rally Sunseeker

Næsta laugardag þ.e. 23. Febrúar taka þeir Daníel Sigurðsson og Ísak Guðjónsson þátt í Rally Sunseeker keppninni sem haldin er í nágreni við Bournemouth á suður Englandi. 90 áhafnir eru skráðar til keppni  í þessari fyrstu umferð í svokallaðri „national“ keppni þeirra Breta en þar má sjá allar útgáfur á rallbílum frá nánast nýjum WRC græjum til heimasmíðaðra ofurbíla, svona í átt við Nissan bíl Steingríms Ingasonar – fyrir þá sem muna eftir honum. Þessi keppni er einnig fyrsta umferð í svokölluð Evo-Challenge en það er í raun keppnin sem Daníel er að taka þátt í. Eru þeir félagarnir með rásnúmer 32 í heildarkeppninni og eru þeir númer 14 af grúbbu N bílunum en hafa ber í huga að Subaru bílarnir taka auðvitað ekki þátt í Evo keppninni þar sem einungis Mitsubishi bílar eru gjaldgengir.

Eftir að hafa tekið þátt í nokkrum keppnum í Bretlandi á síðasta ári á Evo7 bíl sínum hefur Danni fjárfest í Evo 9 bíl, þeim sem Gwendaf Evans keppti á árið 2006 og færði honum Evo titilinn það ár en þessi bíll er sambærilegur við það allra besta sem í boði er í gr.N í dag. Hefur hann notið leiðsagnar Stuart Jones sem er ungur og afar efnilegur breskur ökumaður sem hefur keppt á Evo 9 bíl bæði í bresku meistarakeppninni (BRC) og heimsmeistarakeppninni.

Þessi vika hefur verið skipulögð út í ystu æsar en flogið var út í gær (þriðjudag) og í dag eru þeir að undirbúa bílinn með uppsetningum og stillingum og er Phil Marks, sem er einn fremsti sérfræðingur Bretlands í forritun á vélartölvum, með ásamt starfsmönnum Quick motorsport sem aðstoða þá við þessa vinnu. Quick motorsport sér um að undirbúa bílinn, geyma hann á milli keppna ásamt öðrum undirbúningi og öflun gagna fyrir hverja keppni þar sem erfitt er fyrir Daníel að sjá um þá hluti frá Íslandi. Fimmtudagurinn fer í að merkja bílinn ásamt því að fara yfir leiðarnótur og skoða DVD diska með upptökum af leiðunum sem eknar verða á laugardaginn. Föstudagurinn fer svo í að koma bílnum á keppnisstað ásamt því að skoðun keppnisbílanna fer fram einnig á föstudaginn.

En að keppninni sjálfri. Fyrstur og sennilega sá fljótasti af keppendunum í Evo keppninni er Sebastian Ling en hann var einn af þeim fljótustu í þessari keppni á síðasta ári en það er eins og lukkan fylgi ekki honum alltaf og virðist hann því stundum mistækur. Hann verður samt að teljast sigurstranglegastur í þessari keppni en aðrir sem eru fljótir eru t.d. David Bogie og Keith Cronin. Ef Danni nær góðum tökum fljótt á þessum nýja bíl gæti hann verið á tímum sem eru ekki langt frá þessum aðilum og reikna ég með að hann verði á undan ökumönnum eins og Nik Elsmore sem hefur samt gríðarlega reynslu. Daníel er búinn að gefa út að stefnan sé sett topp 5 í þessari keppni en að aðalatriðið verði að klára og að venjast bílnum. Spurning hvort að speglar og aðrir aukahlutir sem raðað er utan á einn svona bíl fái að vera á út alla keppnina en það var ekki alltaf þannig í fyrra! 

Ég mun reyna að fylgjast með þessari keppni eins og ég get og koma með nýjustu fréttir og tíma á sérleiðum eins og hratt og hægt er. Svo er bara að segja „brake a leg“ og vona að allt gangi upp.

Skyrp, skyrp og allt það....  

 

p.s. Danni, þú fyrirgefur að ég stal sumum myndunum sem fylgja þessari grein af síðunni þinni!

Svona leit bíllinn hans Danna út árið 2006 

Athugasemdir

[Heimir og Halldór Jónssynir, 20.2.2008 kl. 23:28]

Flottur pistill Steini og til hamingju með síðuna,já það verður spennandi að sjá hvernig þetta fer hjá þeim félögum,ég held að þeir muni keyra þetta rallý af öruggi sem er skynsamlegt en þeir lenda samt í topp 15 yfir heildina.