Rallysport

22.10.2009 | 09:28

Rally GB 2009

Þá er komið að lokaumferðinni í WRC en keppnin um heimsmeistaratitil ökumanna er í algleymingi á milli Mikko Hirvonen (Ford) og Sebastien Loeb (Citroen) og er Hirvonen með eins stigs forskot í þessum feikna slag núna fyrir lokaumferðina.

En fyrir okkur hérna á Íslandi er þetta algjört aukaatriði því að þessu sinni höfum við "okkar eiginn" ökumann í þessari keppni en það er að sjálfsögðu Daníel Sigurðsson sem að þessu sinni nýtur fulltingis frá heimamanninum Andrew Swankey í hægra sætinu. Þeir kepptu í Cambrian rallinu núna um helgina til að hita sig aðeins upp og stilla saman strengi og voru á góðu róli þar til á síðustu leið þegar þeir féllu úr 11. sæti í heildina og fimmta sæti í gr.N og niður í 32. sæti og níunda sæti í gr.N en ég hef ekki heyrt hvers vegna. Þrátt fyrir þessi skakkaföll bindum við miklar vonir um góðan árangur hjá Danna og reiknum við ekki með neinni lognmollu í kringum hann frekar en fyrri daginn.

Þessa stundina er í gangi shakedown og verð ég með frekari fréttir af því síðar í dag en fyrsta leið rallsins er keyrð í fyrramálið (fyrsti bíll ræstur kl. 8:23) og er það 32.14 km leið sem heitir Hafren. Þar ætti að verða mættur allnokkur hópur Íslendinga sem eru í þessum skrifuðu orðum í Flugleiðavél á leið til London svo þeir ættu að vera mættir tímanlega fyrir fyrstu leið!